Dyraheio landskapsvernområde med plantelivsfreding, blei oppretta ved kgl.res. 26.9.1997. Utvidinga av området er vedteken etter naturmangfaldlova, og verneformen har vorte endra til landskapsvernområde med biotopvern. Det er eit rikt planteliv i området med m.a. bergjunker som gjer at området også vert omfatta av biotopvern.

Etter utvidinga omfattar verneområdet eit areal på omlag 304 km². Arealet som no er inkludert i verneområdet, var på grunn av større terrenginngrep, som anleggsveg og regulert vatn (Sandvatnet), ikkje med i det opphavlege vernevedtaket i 1997. I ettertid synte det seg likevel at dette delområdet inneheld store naturverdiar tilsvarande dei ein fann i dei tilgrensande verneområda.

I første rekke er desse verdiane knytt til viktige trekk- og beiteareal for villrein. Området ved Sandvassbrekka er av dei viktigaste trekk- og beiteområda for villrein i grenseområda mellom Suldal og Bykle kommunar.